有型鐵騎士
時裝潮流來得快去得更快，不過Biker jacket卻是秋冬季的鐵腳，無論是何家淑女，抑或是鄰家女孩，都有殺錯冇放過，成為今個禮拜曝光率高到爆燈的潮物！無獨有偶，眾星之選都是穩陣而大路的黑色皮製款Biker jacket。今期就找來設計師Henry評一評眾星的品味。
林莉
着得好好，呢款Biker有齊今年興嘅元素，好似細一個碼嘅剪裁、飛膊同埋吊袖，入面襯件絲質衫亦都配合到佢嘅image。如果佢條skinny jeans可以roll-up褲腳，或者揀一條褲腳窄啲嘅，就更好喇。
品味評分: 9分
HotCha Crystal
Biker襯埋今年好興嘅小豹紋裙，加上褸嘅長度啱啱好，配搭得ok。不過，唯一係髮型唔使咁飄逸，可以紮條馬尾，令整體感覺更加有型。
品味評分: 7分
鄧紫棋
雖然佢幾乎全身都係黑色，但因為佢身上有四種唔同料嘅黑色，好似將佢個人斬開四件咁。佢件Biker大得滯，手臂顯得好bulky，似着咗男朋友件衫。
品味評分: 6分
何超雲
今次襯得好好，爛牛仔褲襯黑色皮Biker本身已經好match，加上帶Punk味嘅窩釘boots，成件事好完整，好明顯佢有做功課，見佢將唔同牌子mix & match，好有個人風格。
品味評分: 8分
何超蓮
Biker jacket襯黑色裙都幾好，不過好似爭啲嘢，建議佢可以戴條choker，如果襯埋leather leggings，個Rock feel會更突出。不過佢個髮型啱去Ball多啲，佢可以試吓額前留fringe，依家感覺好Unfinished。
品味評分: 7分
陳偉霆
整個感覺好八十年代！我估佢件樽領冷衫為應節，所以顏色要sharp啲，不過我其實好耐冇見人咁樣着樽領！佢形象好青春又有活力，可以試吓將下身換紅色牛仔褲或者格仔褲，佢絕對carry到。
品味評分: 6分
Henry Lau（劉志華）於1995年在香港理工大學的設計系畢業，翌年創立時裝品牌SPY Henry Lau，曾為梅艷芳和李克勤設計演唱會戰衣，亦曾為何韻詩設計舞台劇服飾。Henry亦致力進軍國際，先後於00年隨香港貿易發展局到悉尼、杜拜、東京和莫斯科舉行時裝騷。
文：名人組
